დათო ჯიქია: 5 წიგნი, რომელსაც თბილისის წიგნის დღეებისთვის გირჩევთ

4, 15 და 16 ნოემბერს თბილისის წიგნის დღეები ­გაიმართა. ღონისძიება უკვე დასრულდა, თუმცა კარგი წიგნების აღმოჩენა და შეძენა არასდროს არის გვიან. როგორც განათლების მთავარი მხარდამჭერი, საქართველოს ბანკი უკვე მესამე წელია, რაც ამ მნიშვნელოვანი მოვლენის გენერალური სპონსორია.

თუ წიგნის დღეებზე დასწრება ვერ მოახერხე ან ახალი საკითხავის ძიებაში ხარ, გთავაზობთ დათო ჯიქიას (ცნობილი ქართული ჯგუფიდან Bedford Falls) ბლოგს. აღმოაჩინე 5 წიგნი, რომელთა შეძენა წიგნის მაღაზიებში კვლავ შესაძლებელია.

ასეთი წვრილმანები – კლერ კიგანი

კლერ კიგანის ნოველა ირლანდიულ ქალაქში შობის სეზონზე ვითარდება, სადაც ერთი კაცის სინდისი დადუმებულ დანაშაულს ააშკარავებს. ეს არის ნაზი და დახვეწილი ტექსტი, რომელიც ერთ დღეშიც წაიკითხება, მაგრამ მკითხველზე ხანგრძლივ შთაბეჭდილებას დატოვებს. ერთდროულად ლამაზი და შემაშფოთებელი ამბავი იმაზე, თუ როგორ შეუძლია თანაგრძნობას სისტემური სისასტიკის დანგრევა. 

გზა – კორმაკ მაკარტი

ეს წიგნი არის სულისშემძვრელი მოგზაურობა დანგრეულ, პოსტაპოკალიფსურ სამყაროში და, ამავდროულად, ერთ-ერთი ყველაზე გულისამაჩუყებელი ამბავი მამა-შვილურ ურთიერთობაზე. კორმაკ მაკარტის მინიმალისტური პროზა პოეტურად აღწერს, როგორ გრძელდება ცხოვრება, როდესაც გარშემო ყველაფერი დასრულდა. ავტორი ამ დაუნდობელი და შავი ამბის მიღმა იმედის ფერმკრთალ ნაპერწკალს ტოვებს და დაგვანახებს, რომ ყველაზე სასოწარკვეთილ გარემოებაშიც შეიძლება ადამიანურობის შენარჩუნება. 

ნარცისი და გოლდმუნდი – ჰერმან ჰესე

ჰერმან ჰესეს ეს ფილოსოფიური ამბავი მონასტერში გამწესებულ ორ ბერზე მოგვითხრობს. დროთა განმავლობაში მათი გზები იყოფა და ისინი სრულიად საწინააღმდეგო ცხოვრებას ირჩევენ, – ერთი ასკეტურსა და სულიერს, მეორე ხორციელსა და ვნებით აღსავსეს. ეს რომანი არის მედიტაცია თავისუფლებაზე, ხელოვნებაზე და საკუთარი თავის ძიების უსასრულო გამოწვევაზე.

ამერიკული პასტორალი – ფილიპ როთი 

ფილიპ როთის შედევრი მოგვითხრობს გაუცხოებაზე, თაობათა შორის კონფლიქტზე და იმაზე, თუ როგორ იმსხვრევა ამერიკული ოცნება ისტორიის გარდამტეხი ცვლილების პერიოდში. წიგნის მთავარი პერსონაჟი ერთი შეხედვით წარმატებული და ბედნიერი ებრაელ-ამერიკელი კაცია, რომლის ცხოვრებაც თავდაყირა დგება, როდესაც მისი ქალიშვილი, 60-იანების რადიკალური პოლიტიკის გავლენის გამო, საფოსტო ოფისს აფეთქებს. ეს არის ღრმა და ჩამთრევი რომანი იდენტობაზე, ოჯახზე და იდეალიზებული ცხოვრების ქვეშ დამალულ ტრაგედიებზე. 

ღამისთევა ფინეგანისთვის – ჯეიმს ჯოისი

ჯეიმს ჯოისის ბოლო რომანი ცნობილია, როგორც ერთ-ერთი ყველაზე იდუმალი ტექსტი, სადაც ლიტერატურა იმდენად უცხო ფორმას იღებს, რომ მასში უთვალავი საიდუმლო მნიშვნელობის პოვნა შეიძლება. ეს წიგნი ქართულად პირველად გამოიცემა, ასე რომ მეც პირველად შევძლებ მასთან შეჭიდებას და ყველას ვურჩევ ამ ენიგმატური რომანის შეძენას. 

ავტორი: დათო ჯიქია