ახალი სასწავლო წლის დაწყებასთან ერთად, გვინდა ის მოსწავლეები გაგაცნოთ, რომლებმაც პროექტ „იდეათეკის“ ფარგელბში, მათი გამორჩეული ინტერესებით მიიპყრეს ჩვენი ყურადღება.
უკვე მეორე წელია, საქართველოს ბანკი იდეათეკების პროექტს ახორციელებს, რომელიც რეგიონის სკოლებში თანამედროვე და მულტიფუნქციური ბიბლიოთეკების მოწყობას გულისხმობს. პროექტის მთავარ მიზანს არაფორმალურ განათლებასა და თანამედროვე ტექნოლოგიებზე წვდომის გაზრდით, მოსწავლეების განვითარების მხარდაჭერა წარმოადგენს.
ამ სტატიაში პროექტის ფარგლებში აღმოჩენილ ერთ-ერთ მოსწავლეს, რომა ადამიას გაგაცნობთ, რომელმაც საკუთარი კომიქსი შექმნა.
რომა ფოთის #1 საჯარო სკოლის მოსწავლეა და მას კომიქსის შექმნის იდეა იდეათეკაში გაუჩნდა – „პირველად იდეათეკაში დავიწყე კლასელების ჩანახატების გაკეთება, გადავწყვიტე ისინი ანიმეს სტილში დამეხატა, მეგობრები გავაფრთხილე და ყველა ინტერესით ელოდებოდა საკუთარი თავის ანიმეს ვერსიის ნახვას. მათგან ჯერ პერსონაჟები შევქმენი, დიალოგებში მათი საუბრის ფრაზები გამოვიყენე და ამ კომიქსის პერსონაჟებიც ასე გაჩნდნენ. კომიქსზე დაახლოებით 1 კვირა ვმუშაობდი, ჩამთრევი და საინტერესო პროცესი აღმოჩნდა“, – ამბობს რომა.
რომას ინტერესი კომიქსების მიმართ თავდაპირველად ანიმეს ყურებით დაიწყო. პირველი ანიმე 13 წლის ასაკში ნახა და ვიზუალურმა მხარემ რომაზე განსაკუთრებული შთაბეჭდილება მოახდინა. შემდეგ მეგობრის რჩევით სხვა ანიმეებსაც უყურა და ამჯერად ვიზუალთან ერთად, მისი ყურადღება განსხვავებული სტილის სიუჟეტმა მიიპყრო.
პირველი კომიქსის შექმნის პარალელურად, რომამ გაგვიზიარა, რომ მეგობრებთან ერთად დაახლოებით 1 წელია ახალ კომიქსზე მუშაობს, რომელიც „ავატარით“ არის ინსპირირებული – „ბოლო 1 წლის განმავლობაში, მე და ჩემი მეგობრები ერთად ვფიქრობთ სიუჟეტზე ახალი კომიქსისთვის. ჩემთვის განსაკუთრებით საინტერესოა პერსონაჟის შექმნის პროცესი – აუცილებელია კარგად დაფიქრდე როგორია შენი პერსონაჟი, როგორ გარემოში იმყოფება ის, მოუფუქრო როგორი ფსიქო ტიპია და ასევე ფიზიკურად როგორ გამოიყურება. ასევე უნდა განსაზღვრო რას ფიქრობს მთავარი პერსონაჟი თავის თავზე და დანარჩენ პერსონაჟებზე და პირიქით – როგორ აღიქვავენ სხვა პერსონაჟები მთავარ გმირს“, – ამბობს რომა.
რომა დასძენს, რომ სიუჟეტის მოფიქრებაში ანიმეების ყურება და წიგნების კითხვა ეხმარება. იდეათეკის მეშვეობით კი კიდევ უფრო ხელმისაწვდომი გახდა მისთვის და მისი მეგობრებისათვის საგანმანათლებლო და შემეცნებითი რესურსები.
რომა ერთ-ერთია იმ 3800-მდე მოსწავლეს შორის, რომელიც აქტიურად იყენებს საქართველოს ბანკის მიერ მოწყობილ სივრცეებს და მათში არსებულ რესურსს (ინტერნეტი, კომპიუტერები, პროექტორები, მრავალფეროვანი ბიბლიოთეკა თუ სხვა შემეცნებითი ხელსაწყოები თვითგანვითარებისთვის. საქართველოს მასშტაბით, უკვე 7 სკოლაში მოეწყო მულტიფუნქციური სივრცე, რომელიც მოსწავლეებისა და მასწავლებლების საყვარელ ადგილად იქცა. სულ მალე ამ ჩამონთვალს კიდევ 2: ახალქალაქის მე-3 და დუისის საჯარო სკოლა შეემატება.
ვრცლად საქართველოს ბანკის სხვა CSR პროექტებზე აღნიშნულ ბმულზე გაეცნობით:
