ზუსტ და საბუნებისმეტყველო საგნების პოპულარიზაციისა და ამ მიმართულებით სკოლის მოსწავლეებში ინტერესის გაღრმავების მიზნით, საქართველოს ბანკმა კომაროვის სკოლასთან პარტნიორობით მასშტაბური პროექტი — STEM ოლიმპიადა დაიწყო. STEM ოლიმპიადა VII-XI კლასის მოსწავლეებს საშუალებას აძლევს, სკოლის სახელით იასპარეზონ და მათემატიკის, ფიზიკის, ინფორმატიკისა და ინჟინერიის მიმართულებით თავი გამოცადონ. STEM ოლიმპიადაზე დარეგისტრირებული მოსწავლეებისა და სკოლების რაოდენობით თუ ვიმსჯელებთ, საქართველოს ბანკისა და კომაროვის სკოლის ერთობლივმა პროექტმა უკვე დიდი დაინტერესება გამოიწვია.
2023-2024 წლის STEM ოლიმპიადაზე რეგისტრაცია 7 ნოემბერს დაიწყო და 3 დეკემბერს დასრულდა. STEM ოლიმპიადაზე 179 სკოლა, ანუ ჯამში 1074 მოსწავლე დარეგისტრირდა, რადგან თითოეულმა სკოლამ 6-წევრიანი გუნდი უნდა წარადგინოს. დარეგისტრირებული სკოლების სრული ჩამონათვალი შეგიძლიათ ნახოთ ამ ბმულზე.
მნიშვნელოვანია ის ფაქტორიც, რომ სკოლის მოსწავლეების წახალისებასთან ერთად, საქართველოს ბანკი მასწავლებლების პროფესიული ზრდის შესაძლებლობაზეც ზრუნავს. თითოეული სკოლის გუნდს მენტორად სკოლის მასწავლებელი უნდა ჰყავდეს, რომლებსაც ოლიმპიადის საკითხების შესახებ კონსულტაციები კომაროვის პროფესიონალებთან ექნებათ, ხოლო მეორე ტურში გადასული მენტორები მოსწავლეებთან ერთად 3-თვიან უფასო გადამზადებასსფეროს სპეციალისტებისგან გაივლიან.
STEM ოლიმპიადის შემდეგი ეტაპები თეორიულ და პრაქტიკულ ტურებად არის დაყოფილი. თეორიული ტური 19 იანვარს ჩატარდება, ხოლო ფინალურ პრაქტიკულ ტურს STEM ოლიმპიადის მონაწილეები მაისში გაივლიან. ორივე ტური ჩატარდება თბილისში, ფიზიკურ ფორმატში. 19 იანვრამდე როგორც მოსწავლეებს, ასევე მენტორებს საოლიმპიადო საკითხებზე წვდომა ექნებათ და თითო საგანში 5, ანუ ჯამში 15 საკონსულტაციო შეხვედრა კომაროვის პროფესიონალებთან ჩაუტარდებათ. თეორიულ ეტაპზე გუნდის წევრებს ფიზიკაში, მათემატიკასა და ინფორმატიკაში ტესტები ჩაუტარდებათ, რის შედეგადაც 10 გუნდი გამოვლინდება, რომლებიც ასპარეზობას პრაქტიკულ ეტაპზე განაგრძობენ.
რაც შეეხება პრიზებს, პირველ ადგილზე გასული გუნდის წევრები და მათი მენტორი საგანმანათლებლო ვიზიტით ჟენევაში, CERN-ის (ბირთვული კვლევების ევროპული ორგანიზაცია) კვლევით ინსტიტუტში, გაემგზავრებიან. ასევე, გამარჯვებული გუნდის სკოლაში STEM კუთხე მოეწყობა. მეორე და მესამე საპრიზო ადგილზე გასულ გუნდებს ლეპტოპები და პლანშეტები გადაეცემათ, STEM ოლიმპიადის ყველა მონაწილე კი სერტიფიკატს მიიღებს.
