რას ისწავლი STEM სკოლაში და როგორია სწავლების ფორმატი

რა არის STEM სკოლა

STEM სკოლა კომაროვის სკოლისა და საქართველოს ბანკის ერთობლივი საგანმანათლებლო პროექტია, რომელიც საბუნებისმეტყველო საგნების პოპულარიზაციის მიზნით შეიქმნა. STEM განათლება აერთიანებს ცოდნას მათემატიკის, ბიოლოგიის, ფიზიკის, ინჟინერიისა და ტექნოლოგიების შესახებ.

ციფრულ ეპოქაში STEM მიმართულებით ცოდნა სულ უფრო და უფრო მოთხოვნადი ხდება: ელექტრული ინჟინერი, პროგრამისტი, მონაცემთა მეცნიერი, ავტომატიზაციის ინჟინერი, კიბერუსაფრთხოების სპეციალისტი – ეს მხოლოდ მცირე ჩამონათვალია იმ პროფესიებისა, რომლებიც ტექნოლოგიური პროგრესის სამყაროში ყოველთვის საჭირო იქნება. STEM სკოლა მიზნად ისახავს, მოსწავლეებს მისცეს ის საბაზისო ცოდნა, რომლითაც ისინი შეძლებენ დაეუფლონ მათთვის საინტერესო პროფესიას მომავალში.

როგორია სწავლების ფორმატი

პროექტში სწავლა ონლაინ მიმდინარეობს. მოსწავლეებს კვირაში ერთხელ (შაბათს ან კვირა დღეს, დილის ან შუადღის ცვლაში) საშუალება აქვთ, დაესწრონ სამსაათიან გაკვეთილებს, რომლებსაც კომაროვის სკოლის პროფესიონალები და მოწვეული პედაგოგები ატარებენ.

როგორია სასწავლო პროგრამა

STEM სკოლის კურიკულუმი და სასწავლო პროგრამა უნიკალურია – იგი არ არის რომელიმე სასკოლო საგნის ანალოგი. STEM სკოლაში მოსწავლეებს საშუალება აქვთ შეიმეცნონ მიკროკონტროლერების მუშაობის პრინციპი. შექმნან და მართონ ჭკვიანი მოწყობილობები, რომლის შესასწავლადაც სპეციალური ონლაინპლატფორმა Tinkercad გამოიყენება, ხოლო პროექტები მიკროკონტროლერ Arduino-სა და მისი შესაბამისი ელექტრონული კომპონენტების ნაკრების საშუალებით სრულდება.

პროექტი ორმოდულიანია. თითოეული მოდული 4 თვეს გრძელდება. პირველ მოდულში მოსწავლეები ძირითადად ელექტროინჟინერიისა და მიკროკონტროლერების, მათი სენსორების მართვის საწყისებს ეუფლებიან, რომლის შესასწავლადაც ასევე იღრმავებენ ცოდნას ფიზიკის (ელექტრობა) და პროგრამირების მიმართულებით.

მეორე მოდულში მოსწავლეები ელექტრონული კომპონენტების საშუალებით ასრულებენ რეალურ ამოცანებსა და პროექტებს. ამ ეტაპზე ისინი აქტიურად არიან ჩართული პრაქტიკულ სწავლის პროცესში, რაც ერთი მხრივ, სახალისოა, მეორე მხრივ – შემეცნების საუკეთესო და აღიარებული საშუალებაა.

ვისთვის არის განკუთვნილი STEM სკოლა

პროექტი განკუთვნილია საქართველოს საჯარო და კერძო სკოლების მე-7-დან მე-11 კლასის მოსწავლეებისთვის, ასევე საზღვარგარეთ მცხოვრები მოსწავლეებისთვის, რომლებიც კარგად ფლობენ ქართულ ენას.

STEM სკოლის შექმნის ერთ-ერთი იდეა მაღალი ხარისხის განათლებაზე თანაბარი ხელმისაწვდომობაა. საგაკვეთილო პროცესის ვირტუალურ სივრცეში გადატანამ, ფაქტობრივად, მოხსნა გეოგრაფიული ბარიერი. 

წელიწადში 60 საუკეთესო შედეგის მქონე მოსწავლეს კი სწავლის საფასურს მთლიანად უფინანსებს საქართველოს ბანკი და გადასცემს სწავლისთვის საჭირო მოწყობილობებს, 30 მოსწავლეს კი 50% უფინანსდება. როგორც თავად მოსწავლეები ამბობენ, მუშაობა ტექნოლოგიებთან უწევთ, ამიტომ ონლაინ გაკვეთილები ძალიან ხელსაყრელია.

ამ ბლოგში მომავლის რამდენიმე მოთხოვნად პროფესიას გაგაცნობთ, რომელთა შესწავლაც ბავშვებსაც შეუძლიათ:

პროგრამირება

ციფრულ სამყაროში ნებისმიერი სფეროს ეფექტური ფუნქციონირება ტექნოლოგიებისა და სხვადასხვა პროგრამის გამოყენებაზე, შესაბამისად, პროგრამისტის საქმიანობაზეა დაფუძნებული. პროგრამირებით დაინტერესებული ბავშვები სწავლის პროცესში კარიერული ზრდისა და განვითარებისთვის აუცილებელ უნარებს შეიძენენ.

ამასთან, მათ შესაძლებლობა ექნებათ, აღნიშნული პროფესიის უფრო ვიწრო მიმართულებებზე კონცენტრირდნენ ან STEM-ის სხვა სფეროების შესასწავლად საჭირო ცოდნა დააგროვონ. ყველა ბავშვისთვის ალბათ ერთ-ერთი საყვარელი მიმართულების, ვიდეო თამაშების შექმნას კი მოსწავლეები Game დეველოპმენტის დაუფლებით თავადვე შეძლებენ.

ელექტროინჟინერია

ყველა ბავშვი სვამს ხოლმე ისეთ კითხვებს, როგორებიცაა: „ეს როგორ მუშაობს?“, „ამ მოწყობილების შიგნით რა ხდება?“. ელექტროინჟინერია მათ, ერთი მხრივ, ამ და სხვა მსგავს კითხვებზე პასუხის საფუძვლიანად გაცემაში დაეხმარება, ამავდროულად კი საშუალებას მისცემს მათ, რომ სრულიად ახალ გამოგონებებზე თავად დაფიქრდნენ, იმუშაონ და მეცნიერების ერთგვარი ჯადოსნური უნარებით აღიჭურვონ.

ასტრონომია

იმ მოზარდებს, რომლებსაც უსაზღვრო ფანტაზიის უნარი აქვთ და არა მხოლოდ მათ გარშემო არსებული გარემოს შეცვლა და გაუმჯობესება, არამედ ჰორიზონტს მიღმა გაღწევაზეც ფიქრობენ, თანამედროვე ტექნოლოგიები ამის რეალობად ქცევის შესაძლებლობასაც აძლევს.

ასტრონომია არა მხოლოდ მომავლის პროფესია, არამედ კაცობრიობის მომავალია, რომელში ძალების მოსინჯვაც მეცნიერებით დაინტერესებულ ნებისმიერ მოსწავლეს შეუძლია.

რობოტიკის ინჟინერია

ვინ თქვა, რომ რობოტებს მხოლოდ ფილმებსა და უმსხვილეს ტექნოლოგიურ კომპანიებში შეხვდებით? რობოტებით დაინტერესებულ ბავშვებს დღეს რობოტიკის ინჟინერიის საფუძვლების სწავლის დაწყება და თავად შექმნაც კი თავისუფლად შეუძლიათ. შეძენილი ცოდნითა და უნარებით კი ვინ იცის, იქნებ ამ სფეროში მორიგი სენსაციის ავტორებადაც კი იქცნენ.

ეს მხოლოდ მცირე ჩამონათვალია იმ კარიერული არეალისა, რომელსაც ეს სფერო ყველა დაინტერესებულს სთავაზობს. რაც მთავარია, როცა ამათგან ერთი კონკრეტული მიმართულებით შეიძენ ცოდნას, ძალიან მარტივია, რომ ნებისმიერ დროს პროფესიული მიმართულება თუნდაც შეიცვალო, რადგან ამ სფეროს საერთო პრინციპები აერთიანებს, რითაც STEM მომავლის ყველაზე პერსპექტიულ დარგად ითვლება.

შედეგები

STEM სკოლაში მოსახვედრად დარეგისტრირებულ მოსწავლეებს უტარდებათ მისაღები გამოცდა მათემატიკასა და ბუნებისმეტყველებაში.

ამავე გამოცდის შედეგების საფუძველზე საუკეთესო შედეგის მქონე მოსწავლეებმა მოიპოვეს საქართველოს ბანკის სტიპენდია. ამჟამად STEM სკოლას 2000-ზე მეტი მოსწავლე, მათ შორის 500-მდე სტიპენდიატი ჰყავს. პროექტში მონაწილეობენ როგორც დედაქალაქის, ისე რეგიონის სხვადასხვა სკოლის მოსწავლეები.

STEM სკოლაში რეგისტრაცია 30 სექტემბრამდე გაგრძელდება.