კარიერასა და პირად ცხოვრებაში წარმატების მისაღწევად მოტივაციის შენარჩუნება რომ უმნიშვნელოვანესია, ეს ყველამ კარგად ვიცით. ამის მიუხედავად, ცხოვრება მუდმივად გეგმის მიხედვით არ მიდის, რის გამოც პერიოდულად მოტივაციას ვკარგავთ და უიმედობა გვიპყრობს. ასეთ დროს დახმარება შეიძლება წიგნებში ვიპოვოთ.
ამ სტატიაში 5 წიგნს გირჩევთ, რომლებიც მოტივაციის პოვნაში დაგეხმარება და რომელთა ყიდვასაც “თბილისის წიგნის დღეებზე” შეძლებ.
1. იკიგაი — ჰექტორ გარსია, ფრანსესკ მირალესი
იკიგაი უძველესი იაპონური იდეოლოგიაა, რომელიც ხანგრძლივი და ბედნიერი ცხოვრების საიდუმლოს ინახავს. იკიგაი მოიცავს ყველაფერს, რაც დილით საწოლიდან ადგომისკენ, ცხოვრებისეული მიზნის პოვნისა და სიხარულის განცდისკენ გვიბიძგებს. თუ თავს დაკარგულად გრძნობ და მოტივაციისა და ენერგიის ნაკლებობასაც განიცდი, შენს კითხვებზე პასუხს სწორედ ამ წიგნში იპოვი.
2. ატომური ჩვევები — ჯეიმს ქლიერი
ჩვენი კარიერა და ცხოვრება სავსეა მიზნებით, რომელთა მიღწევაც გვინდა და გამოწვევებით, რომელთა გადალახვასაც ვცდილობთ. ხანდახან გვგონია, რომ ცხოვრების შესაცვლელად დიდი და მნიშვნელოვანი ნაბიჯების გადადგმაა საჭირო და გვავიწყდება, რომ ცვლილებები პატარა, მაგრამ სისტემატური ნაბიჯების შედეგია. თუ კონკრეტული მიზანი გაქვს, რომლის მიღწევაც გინდა ან მავნე ჩვევა, რომელსაც თავს ვერაფრით ანებებ, ჯეიმს ქლიერის წიგნი მოგცემს მოტივაციას, რომ შენი ცხოვრება უკეთესობისკენ თანდათანობით შეცვალო.
3. შეჭამე ბაყაყი — ბრაიან თრეისი
თუ პირად ცხოვრებასა და სამსახურს შორის ბალანსი დარღვეული გაქვს, სულ გგონია, რომ ვერაფერს ასწრებ და გასაკეთებელი საქმეების სიიდან ერთის გადახაზვასაც კი ვერ ახერხებ, “შეჭამე ბაყაყი” აუცილებლად დაგეხმარება. ბრაიან თრეისის წიგნი ისეთ გამოსადეგ ხერხებსა და მეთოდებს გასწავლის, რომლებიც დისციპლინის, დროის მენეჯმენტის უნარისა და მოტივაციის შენარჩუნებაში დაგეხმარება და შენი წარმატების გასაღებადაც იქცევა.
4. გიყვარდეს ის, რაც არის — ბაირონ ქეითი
“თვით პრობლემა კი არ არის ჩვენი გასაჭირის საფუძველი, არამედ — ჩვენი ფიქრი ამ პრობლემაზე” — ამბობს ავტორი ბაირონ ქეითი, რომელიც თავის წიგნში ნებისმიერი პრობლემის ახალი რაკურსით დასანახად ოთხ კითხვას გვთავაზობს. წიგნში წარმოდგენილი მიდგომები სირთულეების დაძლევასა და ცხოვრების ხალისის შენარჩუნებაში დაგეხმარება. მტკივნეული და დაძაბული ფიქრებისგან გათავისუფლებული კი საბოლოოდ დაკარგული მოტივაციის დაბრუნებასაც შეძლებ.
5. როგორ გავხდი ის, ვინც ვარ — მიშელ ობამა
თეთრი სახლის ყოფილი პირველი ლედი მიშელ ობამა უამრავი ადამიანისთვის დღემდე მიზანდასახულობისა და მოტივაციის ერთ-ერთ უდიდეს მაგალითად რჩება. მრავალი მიღწევის ფონზე, მის გულშემატკივრებს აინტერესებდათ, თუ როგორ გახდა მიშელი ის ადამიანი, რომელიც ახლაა. ამ კითხვაზე პასუხები წიგნში “როგორ გავხდი ის, ვინ ვარ” იპოვი, რომელშიც მიშელ ობამა თავის პირად თუ საჯარო მიღწევებზე, სირთულეებზე, იმედგაცრუებებზე, მიზნებსა და ოცნებებზე გვიყვება. ვინ იცის, იქნებ ეს წიგნი შენც დაგეხმაროს, გახდე ის, ვინც გინდა, რომ მომავალში იყო.
