„იდეათეკა“ საქართველოს ბანკის საგანმანათლებლო პროექტია, რომელსაც ბანკი 2019 წლიდან კორპორაციული სოციალური პასუხისმგებლობის ფარგლებში ახორციელებს. პროექტი რეგიონის სკოლებში თანამედროვე და მულტიფუნქციური ბიბლიოთეკების მოწყობას გულისხმობს. იდეათეკების მიზანი არაფორმალურ განათლებასა და თანამედროვე ტექნოლოგიებზე წვდომის გაზრდა და მოსწავლეებისთვის განვითარების და შემეცნების კიდევ უფრო საინტერესო პროცესად ქცევაა.
იდეათეკა ფუნქციონირებს გორის მუნიციპალიტეტის სასაზღვრო სოფლის, დიცის საჯარო სკოლაშიც. სკოლის მესამე კლასის დამრიგებლის, ანი გოგოაძის თქმით, იდეათეკა გახსნის შემდეგ ყველასთვის საყვარელ ადგილად იქცა.
„იდეათეკაში განთავსებული კომპიუტერები, წიგნები და სხვა საგანმანათლებლო რესურსი ყოველდღიური საგაკვეთილო პროცესის ნაწილი გახდა. რამდენიმეჯერ პროექტორის გამოყენებით მოსწავლეებს ფილმიც ვაჩვენე, რაც მათთვის განსაკუთრებით დასამახსოვრებელი აღმოჩნდა. „იავნანამ რა ჰქმნა“, „მაგდანას ლურჯა“ და სხვა ფილმების ყურების შემდეგ, მოსწავლეებმა დისკუსიაში მიიღეს მონაწილეობა და ერთმანეთს საკუთარი შთაბეჭდილებები გაუზიარეს – მართლაც საინტერესო მოსასმენი და სანახავი იყო, როგორ აქტიურად განიხილავდნენ ფილმს“, – გვიყვება ანი.
იდეათეკამ არა მხოლოდ საგაკვეთილო პროცესს შესძინა მრავალფეროვნება, არამედ მოსწავლეებისათვის შემეცნებისა და თვითგანვითარების საყვარელ ადგილადაც იქცა. დიცის საჯარო სკოლის მოსწავლეები ხშირად თავისუფალ დროს იდეათეკაში, წიგნის კითხვაში, ფაზლების აწყობასა და ჯგუფურ პროექტებზე მუშაობაში ატარებენ.
„სამწუხაროდ დიცის მსგავსს საზღვრისპირა სოფლებში არც თუ ისე ბევრი გასართობია, განსაკუთრებით მცირე ასაკის ბავშვებისათვის. ზაფხულში დასასვენებლად წასვლის შესაძლებლობა ბევრ მოსწავლეს არ ჰქონია, თუმცა მათ ზაფხულის გაფერადება იდეათეკის დახმარებით შეძლეს. ზაფხულის განმავლობაში მოსწავლეებს ჰქონდათ შესაძლებლობა, იდეათეკიდან მათთვის სასურველი წიგნები გამოეტანათ და არდადაგების პერიოდი კითხვაში გაატარეს. როგორც პედაგოგები გვიყვებიან, რამდენიმე მოსწავლემ იკითხა კიდეც, სასწავლო წელი რომ დაიწყება შევძლებდნენ თუ არა კიდევ სხვა წიგნების გამოტანას“, – ამბობს არჩილ გაჩეჩილაძე, საქართველოს ბანკის გენერალური დირექტორი. „ სკოლის მასწავლებლებმა ისიც გვითხრეს რომ მულტიფინქციურმა სივრცემ მოსწავლეებს არა მხოლოდ წიგნის კითხვა შეაყვარა, არამედ აზრის უკეთ გამოხატვაც ასწავლა.
აღსანიშნავია, რომ იდეათეკა პედაგოგებისთვისაც მნიშვნელოვანი ადგილი გახდა. დიცის სკოლის მასწავლებლები ხშირად თავადაც სტუმრობენ იდეათეკას და თვითგანვითარებისა და კვალიფიკაციის ამაღლების მიზნით, პედაგოგებისათვის განკუთვნილ სხვადასხვა წიგნებს ეცნობიან.
