რომელ ბავშვს არ უყვარს სახალისო შეჯიბრი? მით უმეტეს, თუ ამ დროს საკუთარი შესაძლებლობების გამოვლენასთან ერთად, წამახალისებელი პრიზის მიღებაც შეუძლია. აი, სწორედ ასეთი შეჯიბრია კინგსის ოლიმპიადა, რომელიც წლებია, ათიათასობით მოსწავლეს აერთიანებს და აძლევს მოტივაციას, ისწავლონ და წარმატებისკენ ისწრაფოდნენ.
უკვე მესამე წელია, საქართველოს ბანკი კინგსის ოლიმპიადის გენერალური სპონსორია. განათლებაზე ხელმისაწვდომობის გაზრდა და ახალგაზრდებისთვის მეტი შესაძლებლობის შექმნა ყოველთვის იყო ბანკის სოციალური პასუხისმგებლობის ერთ-ერთი მთავარი მისია, ქვეყნის ყველაზე მასშტაბური ოლიმპიადის მხარდაჭერა კი სწორედ ამ მისიის ნაწილია.
რა არის კინგსის ოლიმპიადა
კინგსის ოლიმპიადა სასკოლო საგნობრივი შეჯიბრია, რომელიც ყოველწლიურად ორჯერ იმართება: შემოდგომაზე და გაზაფხულზე. ოლიმპიადა სამ საგანში ტარდება: ქართულ ენაში, ინგლისურ ენასა და მათემატიკაში. მონაწილეობის მიღება შეუძლიათ მოსწავლეებს მე-2 კლასიდან მე-12 კლასის ჩათვლით. საბოლოოდ, თითოეულ საგნობრივ და საკლასო კატეგორიაში ვლინდება სამი გამარჯვებული — ჯამში, დაახლოებით, 90 მოსწავლე. გამარჯვებულები, მოგვიანებით, კინგსის ბანაკში მიემგზავრებიან; ამ სივრცეში ისინი სხვადასხვა საგანმანათლებლო-ინტელექტუალური აქტივობით არიან დაკავებულები, ამასთან, გართობისა და თანატოლების გაცნობის საშუალებაც ეძლევათ.
ყოველწლიურად კინგსის ოლიმპიადაში 120 ათასამდე მოსწავლე ერთვება მთელი საქართველოდან. ოლიმპიადა კი 16 ქალაქში იმართება: თბილისში, ზუგდიდში, ოზურგეთში, ბათუმში, ზესტაფონში, ქუთაისში, სამტრედიაში, თელავში, ახალციხეში, გორში, რუსთავში, გურჯაანში, სენაკში, ჭიათურაში, ფოთსა და ხაშურში.
გამარჯვებულების დაჯილდოებასთან ერთად, მნიშვნელოვანია ისიც, რომ ოლიმპიადის მონაწილეები სწავლობენ დამოუკიდებლად მუშაობას, ეჩვევიან საგამოცდო გარემოს და ივითარებენ დროის მართვის უნარს.
კინგსის აკადემია
კინგსის აკადემია არის ინოვაციური სასწავლებელი, რომლის მთავარი მხარდამჭერიც ასევე საქართველოს ბანკია. აკადემია მოტივირებულ პედაგოგებსა და მოწადინებულ მოსწავლეებს აერთიანებს და ნერგავს სწავლების თანამედროვე, ეფექტურ მიდგომებს. ამ მეთოდების საშუალებით, სწავლის პროცესი უფრო სახალისო და ინტერაქტიური ხდება.
აკადემიის კურსები ამ დროისთვის მოიცავს მათემატიკას, ინგლისურ ენას, პიროვნულ განვითარებას, ჭადრაკს და ციფრულ მარკეტინგს. სწავლება შეიძლება წარიმართოს როგორც ონლაინ, ასევე ფიზიკურ სივრცეში. აღსანიშნავია, რომ საქართველოს ბანკი აკადემიაში სწავლის წასახალისებლად სემესტრულ სტიპენდიებსაც გასცემს.
ფინანსური განათლების ოლიმპიადა
კინგსისა და საქართველოს ბანკის თანამშრომლობის ნაწილია ფინანსური განათლების ოლიმპიადაც, რომელიც მიზნად ისახავს მოსწავლეების ეკონომიკითა და ფინანსების სფეროთი დაინტერესებას. ოლიმპიადაში მონაწილეობა შეუძლიათ მოსწავლეებს მე-7 კლასიდან მე-12 კლასის ჩათვლით.
ერთტურიანი, დისტანციური შეჯიბრისთვის მოსამზადებლად, ოლიმპიადაში მონაწილეობით დაინტერესებულ მოსწავლეებს ლექციების სერია უტარდებათ და ეძლევათ წვდომა ელექტრონულ რესურსებზე. ამასთან, პროექტის ფარგლებში, ისინი ხვდებიან ამ სფეროში წარმატებულ ადამიანებს.
კინგსის შესახებ უფრო მეტს ჩვენი ბლოგიდანაც შეიტყობ, საქართველოს ბანკის სხვა საგანმანათლებლო პროექტებზე კი აქ გაიგებ.
საქართველოს ბანკი თავის ერთ-ერთ მთავარ მისიად განათლების მისაღებად მეტი შესაძლებლობის შექმნას ისახავს. ეს ყველაზე კარგად კორპორაციული სოციალური პასუხისმგებლობის (CSR) ფარგლებში განხორციელებული, მიმდინარე და დაგეგმილი უამრავი პროექტის ფარგლებში ვლინდება. ეს პროექტები ბევრგვარ მიმართულებას მოიცავს და სხვადასხვა აუდიტორიაზეა გათვლილი, თუმცა, ყველა მათგანს ერთი რამ აერთიანებს: შექმნილია იმისთვის, რომ ნიჭიერ და მოტივირებულ ადამიანებს დასახული მიზნების მიღწევაში დაეხმაროს. შენზე მორგებული ასეთი შესაძლებლობა სულ მარტივად შეგიძლია იპოვო CSR.BOG.GE-ზე.
