ცოტა ხნის წინ დასრულდა STEM სკოლის პირველი კურსი და უკვე შეგვიძლია ვთქვათ, რომ პირველმა მიღებამ წარმატებით ჩაიარა: მონაწილეობა სულ 201-მა მოსწავლემ მიიღო, რომელთაგან 63 საქართველოს ბანკმა სრულად დააფინანსა და ამასთანვე მოსწავლეები მათთვის აუცილებელი ტექნიკითაც აღჭურვა.
STEM სკოლა (მეცნიერება, ტექნოლოგია, ინჟინერია, მათემატიკა) საქართველოს ბანკისა და კომაროვის სკოლის ერთობლივი ძალისხმევით შეიქმნა და ხელს უწყობს საქართველოში ზუსტი და საბუნებისმეტყველო მეცნიერებების განვითარებას. ეს საგანმანათლებლო პროექტი პრაქტიკულ სწავლებაზე ორიენტირებული სკოლაა და ქვეყანაში მომავლის პროფესიების განვითარებაზე ზრუნავს.
ნინი ლომიძე ერთ-ერთია მათ შორის, ვინც ახლახან დაასრულა STEM სკოლის პირველი მოდული. როგორც თვითონ აფასებს, ყველაზე მთავარი, რასაც ეს სკოლა მოსწავლეებს აძლევს, არის ყოველდღიურობის ცოდნა და მომავალზე ორიენტირება.
რასაც STEM სკოლა გაძლევს, არის ის, რასაც ყოველდღიურ ცხოვრებაში ვიყენებთ. ვფიქრობ, ბევრი დამაკლდებოდა, ამ სკოლაში რომ არ ჩავრიცხულიყავი
მისთვის ამ სკოლაში სწავლა გამოწვევა იყო, რომელიც სიამოვნებით მიიღო და ეს გამოწვევა მომავალი პროფესიის არჩევაშიც გამოადგება. ზოგადად, ტექნოლოგიები ბავშვობიდან იზიდავს და დაახლოებით, 5 წელია, რაც ამაში ჩართულია. აინტერესებს რობოტექნიკა, საიტებისა და მობილური აპლიკაციების შექმნა. STEM სკოლის ფინალური პროექტისგან მოლოდინი აქვს, რომ შექმნას რამე ისეთი, რაც დაანახებს, რა ისწავლა და როგორ განვითარდა ამ დროის განმავლობაში.
STEM სკოლა ჩემთვის არის მომავალი და მინდა, ამ მომავლის ნაწილი ვიყო. მინდა, ამ მომავალს მე ვქმნიდე და ვიბრძოლებ უკეთესისთვის. აუცილებლად გავაძლიერებ STEM მიმართულებას და ვიქნები ის ადამიანი, რომელიც ახალ იდეებს შემოიტანს
ასევე, მათ, ვინც აპირებს, რომ STEM სკოლაში სამომავლოდ ისწავლოს, ურჩევს, რომ თავიანთი მაქსიმუმი გააკეთონ და დაბრკოლებების არ შეეშინდეთ. მუდამ წინ იარონ და არ გაჩერდნენ.
ტექნოლოგიები ძალიან სწრაფად იქმნება და ვითარდება, საქართველოს კი ამ მიმართულებით ჯერ ისევ მომხმარებლის როლი აქვს. იმისთვის, რომ ქვეყანა ამ მიმართულებით განვითარდეს და მწარმოებლის როლში გადავიდეს, მნიშვნელოვანია, ბევრი საგანმანათლებლო პროგრამა ჰქონდეს და თანაც სწავლება სწორედ სკოლის ასაკიდან დაიწყოს. საქართველოს ბანკი ქვეყანაში ინტელექტუალური განვითარებისა და სხვადასხვა მიმართულებით სწავლების მხარდამჭერია. STEM სკოლა კი ის პროექტია, რომელიც მომავლის პროფესიების განვითარებასა და პოპულარიზაციას უწყობს ხელს.
