სწრაფ ტექნოლოგიურ ექსპანსიასთან ერთად, სიტყვა „კრეატივი“ წლიდან წლამდე იცვლის მნიშვნელობას, კრეატიული ინდუსტრია კი ყოველდღიურად იზრდება. ნიკა გუჯეჯიანის სახელობის სტიპენდიით საქართველოს ბანკი ინდუსტრიაში დასაქმებულ ადამიანებს ეხმარება, აუწყონ ცვლილებებს ფეხი და აღიჭურვონ იმ არაკონვენციური უნარებით, რომლებიც ამ საქმეში სასიცოცხლოდ მნიშვნელოვანია.
სტიპენდია შერჩეულ კანდიდატს მსოფლიოში ერთ-ერთ ყველაზე ცნობილ და პრესტიჟულ სკოლაში, Miami Ad School-ში, 9-თვიან პორტფოლიო პროგრამას უფინანსებს.
ამ დეტალურ გზამკვლევში გიამბობთ, რა და როგორ ისწავლება MASE-ში და როგორ არის შესაძლებელი მადრიდის კამპუსში მოხვედრა საქართველოს ბანკის სტიპენდიით.
Miami Ad School მადრიდში და მისი უპირატესობები
Miami Ad School-ის ისტორია აშშ-ში, მაიამიში იწყება. სკოლა 1993 წელს დაარსდა და მალევე იქცა საერთაშორისო მასშტაბით წამყვან კრეატიულ სასწავლებლად. დღეს Miami Ad School გლობალური ქსელია და 10-ზე მეტ ქვეყანაში აქვს კამპუსი. MAS ციფრული მარკეტინგის, სტრატეგიული იდეების, გრაფიკული დიზაინისა და ფოტოხელოვნების მიმართულებით საუკეთესო სკოლად მიიჩნევა.
მადრიდი კი, როგორც ევროპის ერთ-ერთი უმნიშვნელოვანესი კულტურული ცენტრი, იდეალური ადგილია შემოქმედებითი იდეების აღმოსაჩენად. Miami Ad School-ის მადრიდის კამპუსი ქალაქის ცენტრში, საუნივერსიტეტო ზონაში მდებარეობს.
რატომ MAS?
- „კეთებით სწავლება“ (Learning by doing): პროგრამის მიზანია, სტუდენტს დაეხმაროს ისეთი პორტფოლიოს შეკვრაში, რომელიც მას ნებისმიერ დიდ კომპანიაში გაუღებს კარს.
- დასაქმების მაღალი მაჩვენებელი: სტატისტიკის მიხედვით, კურსდამთავრებულთა 99% სკოლის დამთავრებიდან პირველივე წელს ისეთ წამყვან კომპანიებში საქმდება, როგორებიცაა: Google, TikTok, Ogilvy, McCann, Lola MullenLowe, GUT, DAVID, Facebook, Disney, Coca-Cola, Nike და Starbucks.
- პრაქტიკოსი ლექტორები: გასწავლიან აქტიური პროფესიონალები წამყვანი სააგენტოებიდან (Ogilvy, McCann, PS21, Google და სხვ.).
- ნეთვორქინგი: სკოლა ზრუნავს პროფესიული და მეგობრული კავშირების დამყარებაზე და ხშირად აწყობს საინტერესო ღონისძიებებს.
სასწავლო პროგრამა, მიმართულება და ფორმატი
სტიპენდია ფარავს ერთწლიან (9-თვიან) Portfolio Program-ს, რომელიც კლასიფიცირდება როგორც Local Master. პროგრამები სრულად ინგლისურენოვანია.
შეგიძლია აირჩიო სამი მიმართულებიდან ერთ-ერთი. სასურველი მიმართულების შერჩევაში, სწავლის დაწყებამდე, სკოლის წარმომადგენლებიც დაგეხმარებიან:
- Art Direction: 100%-ით პრაქტიკაზე ორიენტირებული კურსი გასწავლის Adobe-ის პროგრამების (Photoshop, After Effects, InDesign, Illustrator) გამოყენებას, იდეების კონცეპტუალიზაციასა და რეალურ ბრიფებზე მუშაობას. საგნები მოიცავს: Ideas First, Video Storytelling, Branding, Photography.
- Copywriting: პროგრამა ფოკუსირებულია სარეკლამო კამპანიებისთვის დამაჯერებელი ტექსტების შექმნაზე. ისწავლი სტრატეგიულ აზროვნებას, სთორითელინგსა და სხვადასხვა მედიისთვის (მათ შორის, სოციალური ქსელებისთვის) კამპანიების შექმნას.
- Creativity & Artificial Intelligence: შეისწავლი ხელოვნური ინტელექტის ინსტრუმენტების (მაგ. ChatGPT, Midjourney) კრეატიულ პროცესში ინტეგრირებას, AI-ის გამოყენებით იდეების გენერირებას, სურათებისა და ვიდეოების შექმნას და ბრენდებისთვის AI-ზე დაფუძნებული პროექტების შემუშავებას.
დაწყების თარიღები
სასწავლო პროგრამას ორი დაწყების თარიღი აქვს: სექტემბერი და იანვარი.
- სტუდენტები, რომლებიც სექტემბერში დაიწყებენ პროგრამას, მთელ აკადემიურ წელს მადრიდში გაატარებენ და სრულად ჩაერთვებიან კრეატიული კონკურსების სეზონში, რაც მეტ შესაძლებლობას მისცემს მათ, იმუშაონ ინდუსტრიის ჯილდოებისთვის განკუთვნილ პროექტებზე.
- სტუდენტები, რომლებიც იანვარში დაიწყებენ პროგრამას, ზაფხულის ტრიმესტრს დისტანციურად გაივლიან. ასე ისინი საცხოვრებელ ხარჯებს შეამცირებენ, ხოლო მათი პორტფოლიოს საბოლოო განხილვა სექტემბერში, სხვა სტუდენტებთან ერთად გაიმართება.
რას ფარავს სტიპენდია?
სტიპენდიის გარეშე პროგრამის ღირებულება €8,000-დან €10,500-მდე მერყეობს. საქართველოს ბანკის სტიპენდია 100%-ით ფარავს როგორც 9-თვიანი პროგრამის სწავლის სრულ საფასურს, ასევე სარეგისტრაციო/სავიზო მოსაკრებელს (Reservation Fee – €900).
როგორ მოხვდე პროგრამაზე და მიიღო დაფინანსება?
პროგრამაში მოსახვედრად და დაფინანსების მისაღებად მონაწილეობა უნდა მიიღო კონკურსში და მოაგვარო სავიზო საკითხები.
კონკურსის საკვალიფიკაციო მოთხოვნები
კონკურსში მონაწილეობის მისაღებად აუცილებელია:
- იყო საქართველოს რეზიდენტი
- არ აღემატებოდე 30 წელს (30 წლის ჩათვლით)
- გქონდეს დასრულებული უმაღლესი განათლება (ბაკალავრის ხარისხი): ესპანეთის სტუდენტურ ვიზას სხვანაირად ვერ მიიღებ
- ფლობდე ინგლისურ ენას: სერტიფიკატი სავალდებულო არ არის, თუმცა ენა ისეთ დონეზე უნდა იცოდე, რომ სასწავლო მასალის გაგება და გასაუბრებაზე გამართულად საუბარი შეძლო.
როგორ მივიღო მონაწილეობა კონკურსში?
კონკურსი 18 მაისს ცხადდება, შეავსე აპლიკაცია 8 ივნისამდე, თბილისის დროით 19:00 საათზე.
კონკურსისთვის მოსამზადებლად, მიჰყვები შემდეგ ნაბიჯებს:
- MAS Madrid-ის ვებგვერდზე დეტალურად გაეცანი შემოთავაზებულ მიმართულებებს.
- სათანადო დრო დაუთმე პორტფოლიოს, ჟიური მას დიდ ყურადღებას აქცევს, შეარჩიე შენი საუკეთესო ნამუშევრები და დოკუმენტში განათავსე.
- შეადგინე რეზიუმე (CV) და დაწერე სამოტივაციო წერილი. CV-ში ფოკუსირდი განათლებასა და გამოცდილებაზე. სამოტივაციო წერილში კი მკაფიოდ დაასაბუთე მიზნები და მოლოდინები. მოყევი, რატომ არის MAS-ში სწავლა მნიშვნელოვანი შენთვის და როგორ ემთხვევა შენი სურვილები სკოლის მიზნებს.
- შეავსე აპლიკაცია, აპლიკაცია უნდა შეიცავდეს მხოლოდ ტექსტსა და ბმულებს დამატებითი ფაილების (attachments) გარეშე. შესაბამისად, CV, სამოტივაციო წერილი, პორტფოლიო და დიპლომის ასლი ციფრულ საცავში (მაგ. Google Drive, Dropbox) უნდა ატვირთო და მეილში მხოლოდ მათი ბმულები ჩასვა.
- პირველი ეტაპის წარმატებულად გავლის შემდეგ, გაიარე გასაუბრება Miami Ad School-ისა და საქართველოს ბანკის წარმომადგენლებთან. ფინალისტი სწორედ ამ გასაუბრების საფუძველზე გამოვლინდება.
ვიზა, დაზღვევა და საცხოვრებელი
ესპანეთში გასამგზავრებლად სავიზო პროცესის დაწყება დაახლოებით 3 თვით ადრეა რეკომენდებული, რადგან პროცესი შესაძლოა 2 თვემდე გაგრძელდეს.
- ვიზის მისაღებად მონაწილე ჯერ უნდა დარეგისტრირდეს სკოლაში და შემდედ დასტური მიიღოს უნივერსიტეტიდან.
- ჩარიცხვის ოფიციალური წერილის მიღების შემდეგ, MAS Madrid-სა და Euneiz University-ს შორის არსებული შეთანხმების ფარგლებში, სკოლა გამარჯვებულს მიაწვდის სავიზო განაცხადისთვის საჭირო დოკუმენტს. ეს დოკუმენტი ვიზის პროცესს საგრძნობლად ამარტივებს.
- ვიზისთვის სავალდებულოა რეკომენდებულ კომპანიებში ჯანმრთელობის დაზღვევის გაკეთება, ასეთი კომპანიებია: Sanitas, Axa, Adeslas, Asisa.
- მადრიდში ჩასვლის შემდეგ, აუცილებელია, საცხოვრებელ მისამართზე დარეგისტრირება და უცხოელის საიდენტიფიკაციო ნომრის აღება (NIE).
სკოლას საკუთარი საერთო საცხოვრებელი არ აქვს, თუმცა პარტნიორი კომპანიებისა და სპეციალური WhatsApp ჯგუფის მეშვეობით აქტიურად ეხმარება სტუდენტებს ბინის პოვნაში. საცხოვრებლად რეკომენდებული ცენტრალური უბნებია: საუნივერსიტეტო ზონა, Chamberí, Gaztambide, Arapiles და Trafalgar.
სტაჟირება და დასაქმების შესაძლებლობები
9-თვიანი პროგრამის დასრულების შემდეგ, სტუდენტებს აქვთ შესაძლებლობა, გაიარონ 6-თვიანი სტაჟირება ესპანეთში. აუცილებლად უნდა აღინიშნოს, რომ სტაჟირების საკითხი დიდ წილადაა დამოკიდებული სტუდენტის პროფილზე, სავიზო სტატუსსა და სააგენტოებთან შეთანხმებაზე.
სკოლა აქტიურად ეხმარება სტუდენტებს დასაქმებაში სხვადასხვა მხარდამჭერი სერვისით: ნეთვორქინგ ღონისძიებებით, მაგალითად „Portfolio Review“ პროგრამით, სადაც სტუდენტები პირისპირ ხვდებიან წამყვანი სააგენტოების წარმომადგენლებს და საკუთარ ნამუშევრებს განიხილავენ. ასევე ყველა სტუდენტს აქვს წვდომა დახურულ LinkedIn ჯგუფზე, სადაც ხშირად იდება სხვადასხვა რელევანტური ვაკანსია.
ნიკა გუჯეჯიანზე და მისი სახელობის სტიპენდიაზე
ნიკა გუჯეჯიანი 2014-2016 წლებში თავად სწავლობდა Miami Ad School-ში, Art Direction-ის მიმართულებით. მოგვიანებით, ის საქართველოს ბანკში კრეატიული დირექტორის პოზიციაზე მუშაობდა და წლების განმავლობაში შექმნილი უამრავი საინტერესო პროექტით მან დიდი წვლილი შეიტანა ადგილობრივი კრეატიული ინდუსტრიის განვითარებაში.
ნიკას მემკვიდრეობისა და საქმის გასაგრძელებლად 2019 წელს, საქართველოს ბანკისა და MAS-ის თანამშრომლობით, დაფუძნდა მისი სახელობის სტიპენდია. პროგრამის მიზანია, მისცეს ქართველ ახალგაზრდებს ხარისხიანი განათლების მიღების და ინოვაციური იდეებით ქართული შემოქმედებითი ინდუსტრიის განვითარების შესაძლებლობა.
როგორც გასული წლების სტიპენდიატები იხსენებენ, თავიდან ბევრ მათგანს არ სჯეროდა, რომ კონკურსში გამარჯვებას შეძლებდა. თუ შენც გეპარება ეჭვი საკუთარ შესაძლებლობებში: ბევრი არ იფიქრო, არ გაჩერდე და აუცილებლად სცადე!
ნიკა გუჯეჯიანის სტიპენდიის მოპოვება შენი პირველი ნაბიჯია გლობალურ კრეატიულ ინდუსტრიაში სამოგზაუროდ. Miami Ad School არის ადგილი, სადაც შეძლებ იდეები რეალობად აქციო, გაიცნო ნიჭიერი ადამიანები მსოფლიოს სხვადასხვა კუთხიდან და იმუშაო სფეროს საუკეთესო პროფესიონალების გვერდით.
გამოიყენე ეს შესაძლებლობა. იქნებ 2026 წლის გამარჯვებული სწორედ შენ ხარ?!
➔ აღმოაჩინე საქართველოს ბანკის ყველა საერთაშორისო სტიპენდია
