ტრადიციულად, საშემოდგომოდ თბილისის წიგნის დღეები იმართება, რომლის ფარგლებშიც ყველა ასაკის მკითხველს შესაძლებლობა ეძლევა, წლის ბოლოს დაგროვილ ლიტერატურულ სიახლეებს გაეცნოს ექსპოჯორჯიის მე-11 პავილიონში და ზამთრის სუსხიანი თვეებისთვის საკითხავი ფასდაკლებებით მოიმარაგოს.
წელს თბილისის წიგნის ფესტივალის გენერალური სპონსორი საქართველოს ბანკია. ამ თანამშრომლობის ფარგლებში ალექსანდრე ლორთქიფანიძის რეკომენდაციებს გთავაზობთ, რაც ფესტივალზე წარმოდგენილ უამრავ წიგნს შორის თქვენთვის შესაფერისის არჩევაში დაგეხმარებათ.
თანამედროვე ქართული რომანი, რომლის წაკითხვასაც იმ მკითხველს ურჩევდით, რომელსაც ჯერ ახალი ქართული ლიტერატურა მაინცდამაინც არ შეუყვარებია
რომანი, რომლითაც თანამედროვე ქართულ ლიტერატურას შევაყვარებდი ადამიანს, არის აკა მორჩილაძის “სანტა ესპერანსა”. ვფიქრობ, ეს წიგნი თანამედროვე საქართველოს დაბადებაზეც ბევრს ამბობს.
ახალი თარგმან(ები)ი, რომელიც წლევანდელ თბილისის წიგნის დღეებზე არ უნდა გამორჩეს მკითხველს.
რამდენიმე წიგნს გამოვარჩევ: კლერ კიგანის “ასეთი წვრილმანები” ჩემთვის ბოლო დროის ერთ-ერთი აღმოჩენაა, ძალიან მაინტერესებს ნაჯიბ მაჰფუზის “გზა”, რადგან ეს ერთ-ერთი ყველაზე განსხვავებული და თავისებური ავტორია თანამედროვე მსოფლიო ლიტერატურაში, ასევე აღსანიშნავია სესარ აირას კრებული, ამ ავტორის გაცნობა ქართულ ენაზე პირველად შეგვიძლია.
დებიუტანტი ან ახალგაზრდა ქართველი მწერლის წიგნი, რომელსაც მკითხველს ურჩევდით
ამ მხრივ ეს წელი უხვად დახუნძლული აღმოჩნდა, ჩემთვის ყველაზე შთამბეჭდავი იყო თამარ ფოლადაშვილის “ძვლების წიგნი”, გოგა ქობალიას “ჩემი ყანა გადაიქცა მერცხლად” და ივა ფეზუაშვილის “მასკარაფონე”.
წიგნი, რომელიც ბოლო დროს აღმოაჩინეთ, აღფრთოვანდით და სხვებსაც ურჩევთ
არც ისე ახალია, მაგრამ ბოლო დროს აღმოვაჩინე და ყველას ვურჩევ ჰანა არენდტის წიგნის “აიხმანი იერუსალიმში” წაკითხვას.
მოთხრობების კრებული, რომელიც მკითხველის მეტ დაფასებას იმსახურებს
ალბათ, ერთ-ერთი საუკეთესო კრებული რაც წამიკითხავს ქართულ ლიტერატურაში, კოტე ჯანდიერის “კონკიას ღამე”
ჟანრული ლიტერატურიდან რას ურჩევდით მკითხველს
ჟანრული ლიტერატურა ჩემი საყვარელი სამყაროა და მახარებს, რომ საქართველოშიც დაიწყო ძვრები ამ მიმართულებით, ამიტომ ყველას ვურჩევ ფენტეზის ჟანრში ახალ ქართველ ავტორებს, გიორგი ხარაიშვილს და გიორგი კვიტატიანს.
თავად თუ აპირებთ რამის შეძენას ამ ფესტივალზე და თუ კი, თქვენი “საყიდლების სია” რომ გაგვიზიაროთ
მოუთმენლობა საკუთარი გულისა მაიძულებს ხოლმე, წიგნი ლამის გამოსვლისთანავე ვიყიდო, ამიტომ რაც წინასწარ მაქვს შეგულიანებული, თითქმის ყველაფერი უკვე ვიყიდე, ფესტივალზე კი თავისუფალ ცურვაში გადავეშვები და ვეცდები აღმოჩენები გავაკეთო, სიაც სპონტანურად შედგება.
