„მგონია, რომ სკოლის წლებიდან ყველას გვახსოვს ერთი განსაკუთრებული მასწავლებელი მაინც. მაგრამ ეგეთი მასწავლებლები საერთო სურათიდან გამორჩეულები არიან, ყველაზე უბრალო სიტყვებით თუ ქცევებით ბავშვების მოგონებებს, განწყობებს გვიცვლიან.
მე ვიცი მასწავლებელი, რომელმაც დაწყებით კლასებში აღმოაჩინა ჩემი ძლიერი მხარე და თითქოს საიდუმლოდ ინახავდა ჩემთან ერთად. ყველა ბავშვი განსხვავებულია, ზოგს სიმღერის ნიჭი აქვს, ზოგის სპორტის, ზოგს ხატვის და ცეკვის, მე არაფერი გამომდიოდა, მე-2 კლასში კლასის დამრიგებელმა, ქეთინო კოსტავამ, საკლასო დავალება მოგვცა და სანამ ბავშვები მუშაობდნენ, სხვა მასწავლებელთან ერთად უფროსი კლასელებისთვის გამოცანებს განიხილავდა. მე ვუსმენდი, მივედი და პასუხი ვუთხარი. იმის შემდეგ სხვანაირად დავმეგობრდით, სულ მაძლევდა გამოცანებს, კლასგარეშე კითხვებს. დედაჩემს ეუბნებოდა, ეს ბავშვი გენიოსიაო. თავდაჯერებული გავხდი და განსაკუთრებულად ვიგრძენი თავი. მგონია, რომ მეორე კლასში ნაპოვნი თავდაჯერებულობა მთელი ცხოვრება თან გამომყვა.
ქეთინო მასწავლებელი არასდროს მექცეოდა ბავშვურად, დიდებივით ვსაუბრობდით და ვფიქრობდით. სკოლაშიც თავისუფალი და ბედნიერი მივდიოდი, რადგან იქ მასწავლებელი კი არა მეგობარი მეგულებოდა, რომელსაც გულს გადავუშლიდი ნებისმიერ დროს.
ოღონდ, მე არ ვიყავი კლასში გამორჩეული, ყველა ბავშვთან ინდივიდუალური ურთიერთობა ჰქონდა, ყველას ინტერესებს უსმენდა, იმას აკეთებინებდა, რაც მოსწონდათ.
მასწავლებლობის ხელოვნებაც ეგ არის, ყველას ვერ გამოუვა მათემატიკა, წერა, ხატვა, ფიზიკა, მაგრამ არ არსებობს ბავშვი, რომელსაც საერთოდ არაფერი შეუძლია. მასწავლებელმა უნდა იპოვოს ეგ პატარა ნიჭი, თუ შესაძლებლობა და დაეხმაროს განვითარებაში. პატარაობაში განცდილი ემოციები, მოსმენილი სიტყვები და ამბები განსაზღვრავს, როგორი იქნები დიდობაში.
„ყველა ბავშვი იმსახურებს მასწავლებელს, რომელიც თავს განსაკუთრებულად აგრძნობინებს“
თუ შენც იცი გამორჩეული მასწავლებელი და გინდა, ყველას გააცნო, გადადი ბმულზე და გაგვიზიარე საინტერესო ამბავი, რომელიც მასთან გაკავშირებს.
საქართველოს ბანკი ეძებს განსაკუთრებულ მასწავლებლებს, უცნობ და საინტერესო ისტორიებს. წელს კომპანია მასწავლებლის ეროვნული ჯილდოს კონკურსის მთავარი მხარდამჭერია. პროექტი The Global Prize – ის ფარგლებში მასწავლებლების წახალისებისა და დაფასების მიზნით ტარდება.
კონკურსში მონაწილეობა ნებისმიერ მოქმედ მასწავლებელს შეუძლია. რეგისტრაცია უკვე დასრულებულია, გამარჯვებულის ვინაობა კი 5 ოქტომბერს, მასწავლებლის საერთაშორისო დღეს, გვეცოდინება.
