ოჯახის შექმნა ადამიანის ცხოვრებაში ერთ-ერთი ყველაზე მნიშვნელოვანი და საპასუხისმგებლო ეტაპია, რომელიც უდიდეს ბედნიერებასთან ერთად, არაერთ გამოწვევასთანაა დაკავშირებული. ამ ნაბიჯის გადადგმამდე, ბევრ საკითხზე დაფიქრება გვმართებს, მათ შორის ყველაზე მნიშვნელოვანი კი ფინანსური სტაბილურობის უზრუნველყოფაა.
პირველი ნაბიჯი: შემოსავლების შეფასება
სჯობს, წინასწარ გათვალოთ, თუ რა იქნება თქვენი ოჯახის ყოველთვიური საშუალო შემოსავალი. ეს თანხა შეიძლება მოიცავდეს როგორც სახელფასო ანაზღაურებას, ასევე უძრავი ქონების გაქირავებით ან სხვა ნებისმიერი გზით მიღებულ შემოსავალს. ამ პარამეტრის ზუსტად განსაზღვრა თავიდან აგარიდებთ ოჯახის ბიუჯეტთან დაკავშირებულ მოულოდნელობებს და ის მდგრადი ფინანსური სტრატეგიის განსაზღვრაში დაგეხმარებათ.
მეორე ნაბიჯი: აუცილებელი ხარჯების განსაზღვრა
კომუნალურებით დაწყებული, ქირით, დაზღვევითა თუ ვალდებულებებით დამთავრებული, ყოველი აუცილებელი ხარჯი წინასწარ უნდა შეაფასოთ და დაახლოებითი წარმოდგენა შეიქმნათ იმასთან დაკავშირებით, თუ შემოსავლის რა ნაწილი დაიხარჯება ამ მიმართულებით. ბიუჯეტირება მაქსიმალურად მიახლოებულ წარმოდგენას შეგიქმნით თქვენს ფინანსურ შესაძლებლობებზე და ამავდროულად გამოუვალი სიტუაციების რისკს მნიშვნელოვნად შეამცირებს.
მესამე ნაბიჯი: შვილის მომავალზე ზრუნვა
თუკი შვილის ყოლას გადაწყვეტთ, მაშინ ბიუჯეტის გადახედვა მოგიწევთ, რადგან ბავშვის აღზრდა აუცილებელ ფინანსურ ხარჯებთან არის დაკავშირებული. გარდა იმისა, რომ ბავშვისთვის გარკვეული პროდუქტებისა და სერვისების შეძენა მოგიწევთ, ასევე უნდა დაფიქრდეთ იმაზე, თუ როგორ აპირებთ მის მოვლას: ერთ-ერთი მშობლის სახლში დარჩენით, ოჯახის სხვა წევრების დახმარებით თუ ძიძის ჩართულობით. თუკი დარჩენას გადაწყვეტთ, შესაძლოა, სამსახურის მიტოვება ან სამუშაო ადგილის და პირობების შეცვლა მოგიწიოთ, რაც თქვენი ბიუჯეტის ცვლილებას გამოიწვევს.
მეოთხე ნაბიჯი: გაუთვალისწინებელი ხარჯები
მოგეხსენებათ, ცხოვრება მოულოდნელობებითაა აღსავსე – ვინ გახდებით ავად ან როდის გაფუჭდება სარეცხის მანქანა, ამის წინასწარ განსაზღვრა თითქმის შეუძლებელია, ამიტომ სჯობს, ასეთი სიტუაციებისთვის წინასწარ მოემზადოთ და შესაბამისი დანიშნულების ანაბარი გახსნათ, სადაც პერიოდულად გარკვეული მოცულობის თანხას შეიტანთ. იდეალურ შემთხვევაში, ამ დანიშნულებით გადანახული თანხა საკმარისი უნდა იყოს სამი თვით ხარჯების დასაფარად და გადაუდებელი დახმარების უზრუნველსაყოფად.
მეხუთე ნაბიჯი: განტვირთვა და დასვენება
ცხადია, ოჯახის ყოლა მხოლოდ ფინანსურ გამოწვევებთან გამკლავებასა და ბიუჯეტირებასთან არ არის დაკავშირებული. როგორც დასაწყისში აღვნიშნეთ, ეს ადამიანის ცხოვრებაში ერთ-ერთი ყველაზე დიდი ბედნიერების მომტანი მოვლენაა, რომელსაც დაფასება სჭირდება. ზეიმი, გართობა, დასვენება და მოგზაურობა სწორედ ის აქტივობებია, რომელთაც საყვარელ ადამიანებთან ერთად განსაკუთრებული მნიშვნელობა აქვთ, სწორედ ამიტომ თქვენი ბიუჯეტის დაახლოებით 10-20% სწორედ ამ მიმართულებით უნდა გათვალოთ.
ასევე, არ უნდა გამოგვრჩეს შოპინგი, სურვილები და საჩუქრები, რადგან მათ გარეშე ცხოვრება უბრალოდ მოსაწყენია. შეეცადეთ, ამ მიმართულებით იმდენი ხარჯოთ, რომ ყულაბიდან და შავი დღისთვის გათვლილი ბიუჯეტის გამოყენება არ მოგიწიოთ. თუკი ამის საჭიროება მაინც დაგიდგათ, შეგიძლიათ ნაწილ-ნაწილ გადახდის სერვისით ისარგებლოთ და ხარჯები რამდენიმე თვეზე გადაანაწილოთ.
