საქართველოს ბანკის სტიპენდია: სრული გზამკვლევი სტუდენტებისთვის

განათლება ყველაზე მნიშვნელოვანი ინვესტიციაა საკუთარ მომავალში. თუ ხარ სტუდენტი ან აბიტურიენტი, რომელიც მუდმივად ცდილობს განვითარებას, ეძებს ახალ შესაძლებლობებს და სჯერა, რომ შრომა აუცილებლად ფასდება, მაშინ ეს ბლოგი შენთვისაა.

საქართველოს ბანკის სასტიპენდიო პროგრამა სწორედ ასეთი მოტივირებული ახალგაზრდების მხარდასაჭერად შეიქმნა. ამ ბლოგში ჩვენ ვუპასუხებთ ყველა კითხვას და დაგეხმარებით, წარმატებით გადადგა ნაბიჯი შენი მიზნებისკენ.

რა არის საქართველოს ბანკის სასტიპენდიო პროგრამა?

ეს არის საქართველოს ბანკის საგანმანათლებლო ინიციატივა, რომელიც ნიჭიერ და მიზანდასახულ სტუდენტებს საშუალებას აძლევს, მოიპოვონ 100%-იანი ან ნაწილობრივი დაფინანსება საქართველოს 21 წამყვან უნივერსიტეტში.

პროგრამის მთავარი მიზანია, ხელი შეუწყოს მომავალ პროფესიონალებს, განათლებაზე ფინანსური ხელმისაწვდომობის გაზრდის გზით.

არქიტექტურის სტუდენტებისთვის – გიორგი ჩახავას სახელობის სტიპენდია

თუ არქიტექტურის მიმართულებით სწავლობ ან გეგმავ სწავლის გაგრძელებას, უნდა იცოდე, რომ საქართველოს ბანკს გიორგი ჩახავას სახელობის სტიპენდიაც აქვს.

სტიპენდია ითვალისწინებს სწავლის 100%-ით ან ნაწილობრივ დაფინანსებას მათთვის, ვინც არქიტექტურის ფაკულტეტზე ოთხ პარტნიორ უნივერსიტეტში ირიცხება:

• თავისუფალი უნივერსიტეტი
• საქართველოს ტექნიკური უნივერსიტეტი
• თბილისის სახელმწიფო სამხატვრო აკადემია
• ბათუმის შოთა რუსთაველის სახელმწიფო უნივერსიტეტი

ვის შეუძლია სტიპენდიის მოპოვება?

პროგრამაში მონაწილეობა შეუძლია საბაკალავრო საფეხურის ნებისმიერი კურსის სტუდენტს (როგორც მათ, ვინც ახლახან ჩააბარეს უნივერსიტეტში, ასევე იმათაც, ვინც უკვე სწავლობს სასურველ ფაკულტეტზე), მთავარია, გქონდეს მაღალი აკადემიური მოსწრება (GPA) და ჟინი, გახდე გამორჩეული პროფესიონალი. ჩვენთვის მნიშვნელოვანია, ვხედავდეთ შენს მიზანდასახულობასა და განვითარების სურვილს.

როგორ მუშაობს შერჩევის პროცესი?

შერჩევა რამდენიმე ეტაპად მიმდინარეობს, რათა საუკეთესო და ყველაზე მოტივირებული კანდიდატები გამოვლინდნენ:

• აპლიკაციების მიღება: დეტალური ინფორმაცია და თარიღები მოიძიე შენი უნივერსიტეტის ვებგვერდზე ან ადმინისტრაციას მიმართე.
• აპლიკაციების გადარჩევა. ამ ეტაპზე უნივერსიტეტები განიხილავენ შენს აკადემიურ მოსწრებას (GPA) და სამოტივაციო წერილს. სწორედ აქ უნდა აჩვენო, რატომ იმსახურებ სტიპენდიას. როგორც ჩვენი ერთ-ერთი სტიპენდიატი, ლიზი ლოჩოშვილი ამბობს, პროექტი „ეძებს რეალურ ადამიანებს თავიანთი გამოცდილებით, ავთენტურობითა და მიზნებით“.
• გასაუბრება. თუ ამ ეტაპზე გადახვედი, ეს უკვე ნიშნავს, რომ შენმა მონაცემებმა და სამოტივაციო წერილმა შთაბეჭდილება მოახდინა. ახლა შენი ჯერია, პირადად დაარწმუნო კომისია. ანდრო დგებუაძის რჩევა ასეთია: „იყავი ის, ვინც ხარ“.
• თითოეული უნივერსიტეტი დამატებით კრიტერიუმებს ინდივიდუალურად განსაზღვრავს.

როგორ დავწერო გამორჩეული სამოტივაციო წერილი?

სამოტივაციო წერილი შენი სავიზიტო ბარათია. აი, რამდენიმე რჩევა:

• იყავი გულწრფელი: მოყევი შენი რეალური ისტორია, მიზნები და ის, თუ როგორ დაგეხმარება სტიპენდია მათ მიღწევაში.
• აჩვენე შენი მოტივაცია: ახსენი, რატომ აირჩიე შენი პროფესია და რა გსურს შეცვალო უკეთესობისკენ.
• დააკავშირე შენი მიზნები მომავალთან: აღწერე, როგორ გამოიყენებ მიღებულ ცოდნას. შთაგონებისთვის, წაიკითხე ლუკა კობიძის ისტორია, რომლისთვისაც მთავარია, „შემოქმედების გზაზე არ გაჩერდე“.

რომელ უნივერსიტეტებშია სტიპენდია ხელმისაწვდომი?

• თბილისის სახელმწიფო უნივერსიტეტი (თსუ)
• ილიას სახელმწიფო უნივერსიტეტი
• თავისუფალი უნივერსიტეტი
• აგრარული უნივერსიტეტი
• თბილისის სახელმწიფო სამხატვრო აკადემია
• ქართულ-ამერიკული უნივერსიტეტი (GAU)
• საქართველოს ტექნიკური უნივერსიტეტი (სტუ)
• თბილისის სახელმწიფო სამედიცინო უნივერსიტეტი
• საქართველოს ეროვნული უნივერსიტეტი (SEU)
• სოხუმის სახელმწიფო უნივერსიტეტი
• თელავის სახელმწიფო უნივერსიტეტი
• ბათუმის სახელმწიფო საზღვაო აკადემია
• ბათუმის შოთა რუსთაველის უნივერსიტეტი
• ქუთაისის საერთაშორისო უნივერსიტეტი (KIU)
• საქართველოს საერთაშორისო უნივერსიტეტი (GIU)
• ზუგდიდის სახელმწიფო სასწავლო უნივერსიტეტი
• სპორტის უნივერსიტეტი
• თეატრისა და კინოს უნივერსიტეტი
• კონსერვატორია
• სამცხე-ჯავახეთის სახელმწიფო უნივერსიტეტი
• საქართველოს უნივერსიტეტი

სად ვიპოვო შთაგონება? გაიცანი ისინი, ვინც ეს გზა უკვე გაიარეს

ყველაზე კარგი მოტივაცია ხომ იმ ადამიანების ისტორიებია, რომლებიც შენსავით იწყებდნენ. მათაც ჰქონდათ კითხვები, ეჭვები, მაგრამ მიზანდასახულობით და შრომით შეუძლებელი შეძლეს.

გაიცანი რამდენიმე მათგანი, იქნებ მათ შორის შენი მომავალიც დაინახო:

• დაფიქრებულხარ, რა გრძნობაა, როცა ხვდები, რომ შენი დაუღალავი შრომა დაფასდა? რევაზ ყაველაშვილის ისტორია სწორედ ამ გრძნობაზეა და კიდევ იმაზე, თუ როგორ გაძლევს ეს აღიარება კიდევ უფრო დიდ მოტივაციას.
• სწავლის დაფინანსება თუ პირველი სტაჟირება? რატომ „თუ“, როცა „და“ შესაძლებელია? ნახე, როგორ შეძლო ლილი კერესელიძემ ორივე შესაძლებლობის ერთად მოპოვება და კარიერული გზის დაწყება სწავლის პარალელურად.
• გეშინია, რომ არ გამოგივა და ამის გამო პირველ ნაბიჯსაც არ დგამ? მაშინ აუცილებლად უნდა წაიკითხო ბლოგი სტუ-ს სტიპენდიატ ლუკა წულაიაზე, რომელიც დაგარწმუნებს, რომ „სჯობს, სცადო და არ გამოგივიდეს, ვიდრე საერთოდ არ სცადო“.
• რას ნიშნავს, როცა შენს მიზნებს რეალურად უახლოვდები? ეს არ არის უბრალოდ წარმატება, ეს საკუთარი თავის პოვნის პროცესია. აღმოაჩინე ეს შეგრძნება თავისუფალი უნივერსიტეტის სტიპენდიატთან, ნიკოლოზ ცაგარელთან ერთად.
• ეს მხოლოდ მცირე ნაწილია… თუ კიდევ უფრო მეტი შთაგონება გჭირდება, გაიცანი სხვა სტიპენდიატებიც, რომლებიც არ ჩერდებიან.

შენ უკვე გაეცანი სტიპენდიის დეტალებს, ნახე, რა ნაბიჯებია გასავლელი და, რაც მთავარია, წაიკითხე იმ ადამიანების ისტორიები, ვისთვისაც ეს პროგრამა წარმატების დასაწყისი გახდა.

მზად ხარ, შენც გახდე სტიპენდიატი?

რეგისტრაციისთვის ეწვიე stipendia.bog.ge-ს, აირჩიე შენი უნივერსიტეტი და შეავსე განაცხადი.

თუ საზღვარგარეთ სწავლაზე ფიქრობ, აღმოაჩინე საქართველოს ბანკის საერთაშორისო სტიპენდიებიც